أوبريت بياع الشيكولاته /بقلم المبدع الشاعر الأستاذ محمد يوسف توفيق

اوبريت بياع الشيكولاتة
----------------------------.
تنفرج الستار عن سوق والناس تتجول فيه ذهاباً وإيابا..ويتوسط السوق ثلاث محلات

1)محل لبيع الشيكولاتة لصاحبه (توفيق)
2) ومحل اخر لبيع الهدايا الخاصة بعيدالحب
3)والمحل الثالث مخصص لبيع الزهور

(ويظهر بائع الشيكولاتة (توفيق) وهو يقوم بتنظيف الفاترينات)

توفيق:- احنا فتحنا بسم الله
وإستفتاحنا عليك ياكريم
هنسمي بسم الرزاق
مين غيرك يارب معين

( وهنا تدخل زبونة الى المحل وتخاطب توفيق)

زبونةرقم1:- اهلاً مرحب ياسي توفيق
احلى صباح فل وياسمين
عندك شيكولاتة بالملبن
حلوة عشان القلب يلين
ههديها بس لأحبابي
يبعد عنا شر العين

توفيق:- اهلا مرحب ست بهية
رشوا الورد مع الياسمين
اطلبي مني فداكي حياتي
والله و عينية الاتنين
فيه شيكولاتة لو تاكليها
هتخلي القلب يلين
دى هدية بس لبهية
سحر وبلسم للعاشقين

الزبونة رقم1:- إديني كيلو
م الوصفة دية
لجل حبيبي
يحن شوية
ويبطل في السوق ملاغية

توفيق:- لجل عيونك مني هدية
ولجل سلامة قلب بهية
ده انا م الصبح واقف مستني
إن البدر يهل عليه
وكل طلباتي في الدنيا
انك ترضى بس عليه

الزبونة رقم 1 :- ياخراشي منك
ومن كلامك
شوف كام زبونة
فاتوا قدامك

توفيق :- السوق مليان كتير الألوان
وانتي لوحدك شغله البال
قولى مين راح يشغل باللي
ولا مين هيشقلب حالي
إلا عيون ست الغزلان
ومفيش فى القلب الا بهية
ولاغيرها في القلب محال

الزبونة رقم 1 :- ياخوفي منك ومن كلامك
بنام وأصحي على اوهامك
خايفة أكون ذى الباقيين
اللي راحوا في سحر غرامك

توفيق :- مش ممكن ابدا يابهية
ده انتى روحي وضى عينية
والشيكولاته لو تاكليها
راح تشكيلك ظلمك ليا

الزبونة رقم 1 :- طب اعطيني وخليني أمشي
قبل ما حد يطب عليا
وراح هنكمل باقي حكايتنا
لما أجي المرة الجاية

(وتخرج بهية وهى تحمل علبة الشيكولاتة )

ويخرج توفيق امام المحل وهو مبتهج ويتراقص من الفرح بينما اصحاب المحلات الاخري ينظرون اليه فى غيظ وهم يجلسون امام محلاتهم بلا بيع أو شراء))

توفيق:- دوق ياأمير دوقي يااميرة
الشيكولاتة بإيد توفيق
راح هتخلي حياتك جنة
قطمة واحدة القلب يطيب
بسم الحب دوق شيكولاتي
مين راح يهرب م المكتوب
دوق ياامير دوقي يااميرة
حته منها القلب يدوب

بائع الزهور:- مش معقول السوق مفهوش
الا شيكولاتة توفيق
كل الناس تيجي وتعبى
والستات تيجي وبتسأل
عن دكان عمك توفيق

بائع الهدايا:- ليه اسلوب ذى التعابين
دي شيكولاته ودى بمبونى
وأحنا ديماً كده قاعدين
بنفتح دكاكنا ونقفل
ما إستفتحنا بولا مليم

( وهنا تدخل زبونة للمحل ويستقبلها توفيق بالترحاب)

توفيق :- أهلا مرحب بالشيكولاته
قوللى والله تطلبى ايه
كل أنواع البمبوني
وعندى كل اللى تحبيه

الزبونةرقم 2 :- عمرك ذوق ياسى توفيق
وكلامك للقلب طبيب
حتى كلامك بقا شيكولاته
أسمعها القلب يشيب
ادينى كيلو م العلبة دي
لجل ما أخدها وأروح ع البيت

(توفيق وهو يعطيها قطعة شيكولاته)

توفيق:- طب مدى ايدك وخدى ديا
من توفيق ياسنية هديه

الزبونةرقم 2:- تسلم ايدك ويا عينيك
من فضله ربنا يعطيك

( وتغادر الزبونة المحل وهى تحمل كيس الشيكولاته)
ويخرج توفيق امام المحل وهو مسرور وسعيد))

توفيق:- السعادة مش بالمال
هى حقيقة ومش احلام
كلمة حلوة وراحة بال
راح تملك خاتم سليمان

(وهنا تدخل زبونة الى المحل وتخاطب توفيق)

الزبونة رقم 3:-
أهلا مرحب ياسي توفيق
عندك شيكولاته بالجوز
اعطيني منها 2 كيلو
كيلو بالبندق
وكيلو باللوز

توفيق :- عندي كل اللي تحبيه
شيكولاتة سادة أو بحليب
لو دوقتيها راح تلاقيها
دوا للقلب وأحلى طبيب
أحلى شيكولاتة بالدنيا
الشيكولاتة بإيد توفيق

الزبونةرقم 3 :- شيكولاتك صدقني حكاية
باكلها وتعيش ويايا
بحلم بيها ..وأعيش لياليها
وقلبي ديماً مغرم بيها

توفيق :- أجمل شيكولاتة بالدنيا
طبعاً شيكولاتة توفيق
طلباتك أطلبي يازكية
ده فداكي قلبي وعينية
وخدي مني دى هدية
لجل ما قلبك يحن عليا

(وتخرج الزبونة من المحل وهى تحمل الشيكولاته)
( ثم تدخل المحل الزبونة رقم 1 (بهية))

بهية :- جيالك هنشوف حكايتنا
ونكمل باقى قصتنا
ونشوف حل لقضيتنا
اللى على لسان كل الحتة

توفيق:- انتى عارفة ان انا بهواكي
وقلبى طول اليوم وياكي
والشيكولاتة هى حياتنا
وهى شغلة كل أجدادي

بهية :- شيكولاتك بيدوقها كتير
بتوزع وبدون تقدير
دي شيكولاتة
ودي بمبوني
بتبيعلي وتبيع للغير

توفيق :- جوا السوق الكل يدوق
وأنتي عارفه أنا راجل ذوق
يعني أشوف قلب بيعاني
وأسيبوه كدهوا محروق

الزبونة :- أنت طبيب لكل مريض
وحبايبك على كل طريق
ولا شاغل قلبك إنسان
ولا حبك مخلص وحقيق
لو تخلص هتسيب السوق
وهترجعلي بلهفة وشوق
ده القلب منك محروق
قوللي ياتيفا ايمتى تفوق

(هنا يدخل بائعا الورد والهدايا المجاوران لمحل توفيق)

بائع الورد :- أنا وردي خلاص بيودع
مهما أرويه مش راضي يفوق
عمك توفيق غطى علينا
ومسيطر على كل السوق

بائع الهدايا :- الأحباب هجروا الدباديب
والأحمر بقى لونه غريب
كل العشاق تيجي وتاخد
شيكولاتة عمك توفيق

توفيق :- السعادة مش في الدبدوب
ولا وردة هتصحي قلوب
السعادة دي شىء مكتوب
جوا شيكولاتة توفيق

انا بياع أفراح وسعادة
تلاقيها في قطمة شيكولاته
نظرة وكلمة لقاء في غرام
تلقى الفرحة دي فوق العادة

بهية:- يعنى تِدَوق كل السوق..!
دا الشيكولاته بقيتلي عزول؟
مش عارفه أرسي علي برك
وانت طول اليوم مشغول
دى تدوقها
ودى تلاطفها
وأنا على طول دمي محروق

توفيق :- أنتي حياتي وكل منايا
وأنا ديماً تعبك ويايا
وأنا قلبي ديما يسألني
ويلومني ويقوللي تملي
أنت بتبيع الشيكولاتة
ولا عارف تسعدها معايا

بهية:- إسعد قلبك ياسي توفيق
وإسعد كل مناك وياك
وبلاش تتعب بس قلوب
ذنبها إنها عايشة معاك

توفيق :- يعني أسيب مهنتي وحياتي
وأهجرها وأعيش وياكي
قلبي وعقلي في حيرة تملي
بين شيكولاتي وحب ملاكي

بهية:- قرر أنت مين تختار
عين في الجنه وعين في النار
لو باقي على حب زكية
مش راح تتعبها تملي معاك
وتضحي بالعالم كله
لجل ما تبقى في يوم وياك

توفيق :- والله قلبي وعقلي معاكي
وبيقولوا ان الدنيا فداكي
الاخلاص والحب الصادق
وأنتي أملي وكل حياتي
الدكانه خلاص هقفلها
والشيكولاته فداكي اهجرها
ولا أخسرش بس هواكي

ابهية:- خليك فاتح باب دكانتك
بس تبيع شيكولاتة وبس
متبعش وياها كلام
وبقلبي ترحم وتحس

توفيق :- الشيكولاتة ملك إيديكي
راح أتركها لجل عنيكي
والله أنا نفسي في يوم أرضيكي
وحياتي وعمري أديكي

( هنا يهب بائعا الورد والهدايا وهما فرحان)

البائعان :- كده راح يفضى علينا السوق
والواحد دكانته تفوق
ما خلاص توفيق راح يتهنى
واحنا نبيع تاني وتروق

بهية :- وأوعدك على طول تتهنى
وحياتك هقلبها لجنة
وسعادتي علي طول هتدوقها
أجمل من شيكولاتة توفيق

( ويغلق توفيق المحل ويمشى هو ومحبوبته وتنخفض الاضواء بإنتهاء الاوبريت)

(انتهى)