،،،،،،،،،،(فكر وظيفي)،،،،،،،،،،،،
ابني إتوظف قولوا وباركوا
جات له وظيفة
وفيها اتشاركوا
نص مرتب رايح شغله
ونصة التاني راجع بَيّْتُه
يعني يومين في الباص مِتّكَيف
كأنه في رحلة وفيها مِصٍيف
يعني يومين يوصل على شغله
ويومين راجع خٍلٍّص زَيّتُه
ناس بتخطط في التوزيع
ابني إتوظف لجل يضيع
ولما بتوصل للمسؤول
واسطة كبيره هترفع رايته
ولما الواسطة إتخلت عنه
راح لوظيفة هتسحب دمه
بعد شهور شوفنالو رسول
وواسطة كبيرة لجل حمايته
تم النقل ياناس بصعوبة
لكن تاني جابوله الخيبه
جابوا مكان محتاج تغريبة
ست ساعات راكب من بيته
يعني الراتب يكفي وصوله
رايح بس يادوب ويطُوله
وطول الشهر يشوف له حُلوله
وبلاش يبدأ يبني حكايته
يعني لاياكل ولايتجوز
يكمل عمره وماشي مبوز
ولايوم يوصل علشان يبصم
يعني الراتب ضاع في بدايته
حد يقول معقول دي عقول
تقدر تمشي بالأسطول
أو يبقى لها عرض وطول
فكر ياناس محتاج لنهايته
لسه بنلبخ في الموضوع
والمسؤول محتاج لضلوع
رافض لحظة يكون ف خشوع
وبلاش فكرة . ياريت بشهامته
ابني إتوظف وانا ببعت له
وإتصالات بيقول لك هات له
لجل يكمل مرة في أكله
ويجوع يوم ينساه لو فات له
ابني اتوظف في المجهول
عِلَه الفعل وانا المفعول
جاب لي وظيفة وحد يطول
ربي تِحِن علينا إدارته
وشغله يكونله قريب من بيته
،،،،،،،،،،،،(شعر)،،،،،،،،،،،،،،
عبد الله السايح
0 التعليقات:
إرسال تعليق