#وفاة_شاعر
....................
كان فى هنا فى حيينا
شاعر كبير بربابة
يكتب شعر عن العاشقين
يكتب عن الناس الغلابة
يكتب عن الدنيا اللى قبلت تخلف للضعيف ديابة
يكتب عن الأمل اللى مات جوة قلوب العذارة
يذكر ف شعره الحزين
بابلونيرودا وجيفارا
شعره للعاشقين علامة
وشم..ختم..شعار..اشارة
بس مات ياخسارة عمره
كله راح ف الشعر بجدارة
تعرفوا دة يبقى مين
والا اسمه بين الوف الميتين
بكل فخر يبقى انا
عايش بقالى سنين
بس ميت من سنة
لادوقت طعم الفرح
ولا السعادة والهنا
وانضم اسمى للعاشقين
جوة كشوف السهارة
وجروح كتير اتكلمت جوة قلبى بأبلغ عبارة
بس مالاقتش الطبيب اللى يداوييها بأستشارة
عشت السنين صبر ودموع
حزن انتشر وسط الضلوع
زرع الألم ف القلب تارة
وتارة تانية زرع عذاب
والوجع هو الأمارة
كأنى مقطوع من شجر
ماليش حبيب يسأل عليا
والدموع ف عينيا نشفت
اصبحت زى الحجارة
مين تكون للقلب شمس
تنور ف زواياه كل حارة
مين تكون ليا الحبيبة
من غير مقابل او تجارة
وشرط الشوق الوصال
وشرط المحبة الجسارة
بقلمى..هانى السيد
من وحى اللحظة
27/10/2016
0 التعليقات:
إرسال تعليق