(سامحيني يا بـــلدي )
****************
قالها غريب مفتون
دى مصر هبة النيل
شوف الأدب والفنون
ويا عيني ع المواويل
يا أم الضفاير طوال
والنظرة قتالة
متصدقيش اللى قال
دى عليكى محتالة
بكرة هيجى اليوم
ينطق لسانا الحق
كترت علينا الهموم
والحزن بابنا دق
فى البعد عنك دقيقة
تشتاق قلوبنا سنين
والغربة تخفى الحقيقة
نترك بلادنا مظلومين
هوا الزمن قاسى
ولا ضميرنا مات
إمتى يجى وقتى
واخلص من الأزمات
مش رايدة عيشة القصر
ولا قندحة ف لولى
وان جيت عليكى يا مصر
لا تظنى ولا تقولى
بعتك بسعر قليل
وقبضت تمنك كاش
فى هواكى كنت عليل
وعلاجى مش ببلاش
طب روحتى فين منى
وانا كنت بتألم
دوبى صغير سنى
لسانى بتعلم
بردانة ليلى شتا
ودبحنى حر الصيف
عايشة فى ظلم وأسى
بحلم بأكل نضيف
وشرابى هوا المر
والجهل مالينى
حلمى أعيش انا حر
يا رب قوينى
تعبانة انا من الذل
من القرب والأغراب
ومكانتى اهى بتقل
ومعادشى ليا اصحاب
***************
شاعرة الأمل / منى احمد سالم
أسوان - إدفو
0 التعليقات:
إرسال تعليق