(( كلمة تحرك جبل .. وكلمة تزرع أمل ))
( بشعر العامية المصرية ) .
تأليف أ / عبد الرحمن الحناوي .
********************************
كلمة تسعد قلب وكلمة تسحر عين *
وكلمة ترضي النفس وكلمة بين وبين *
وكلمة طعمها حلو وكلمة مر أنين *
وكلمة تقول للقلب الحب طريقه فبن *
********************************
كلمة تحرك جبل وتمسي ع الحلوين *
وكلمة تزرع أمل في قلوب اليائسين *
وكلمة تسحر بشر يمشوا مع التايهين *
وكلمة تخلي الدجل مقطع الودنين *
وكلمة تريح البال وكلمة غراب البين *
وكلمة توقف الحال صاروخ وجاي منين *
جاي مش واخد بالك حرس بقي م العين *
وكلمة أجمل منها ما لقيت بين اتنين *
كلمة سلام ومحبة وصفاء بين قلبين *
********************************
كل الكلام أنواع يا تفرح يا تبقي حزين *
دا شاري ودا بياع ودا بيوقع بين اتنين *
ودا طيب ودا خداع ما شافش الحق فين *
يا صاحبي خلي الكلام أخد وعطا باللين *
واعرف إن الكلام دا سلاح ذو حدين *
كلمة تودي المعتقل وكلمة تفرح روحين *
وكلمة تنيم بلد وكلمة تصحي النايمين *
وكلمة تحرك وطن وكلمة تجمع ملايين *
وكلمة بتعيش زمن وكلمة موتها مشين *
وكلمة تكشف ستر وكلمة تستر زين *
وكلمة تربك نفس وكلمة فيها حنين *
وكلمة زي السيف تقسم جسد نصين *
وكلمة زي الشوك تنهش لحوم وتهين *
وكلمة تترك بدن مرمي علي الجنبين *
يشكي لمين حاله صايباه أكبر عين *
يا حلاوته يا جماله من قبل كدا بسنين *
بكلمة اتغير حاله وصبح مع المساكين *
ربنا يصلح حاله ويحميه من القاسيين *
ويريح دايما باله ويكفيه شر العين *
خلي كلامك مفيد وحاسب من الملكين *
واحد علي شمالك وتانيهم ع اليمين *
يسجلوا كل كلامك لا نقص ولا تزيين *
********************************
بقلم أ /عبد الرحمن فتحي الحناوي .
من / مصر .
كتبت يوم الاثنين 29 من أبريل سنة 2018 .
********************************
0 التعليقات:
إرسال تعليق