رباعيات /بقلم المبدع صلاح منير

رباعيات بقلم: صلاح منير
رقم11
ع الأرض دبي ياحلوة بكعب عال ودبدبي
شد القوام وأرفعي رأسك في العال واتبسمي
اتجرئي ومدي الخطاوي لا تتلفتي ولا تنحني
شبي عن الأرض فوق, طيري ريشة في الهوى
رقم12
خلق الأله في ابن آدم الخير ويا الشر
خليك مع الخير يابني تكسب وما تنضر
وابعد عن الشر حتي لو كنت له مضطر
امشي في طريق الخير يابني يوصلك للبر
رقم13
اياك يا بن آدم تتغر يوم بقوتك
دة كله زايل مش دايمة صحتك
شوية برد في شتا تعيك وترقدك
أو قرصة بعوضة صيف تموتك
رقم14
الواد وسيم ومهندم والبنت قمرايا أكيد
على شط النيل صحبة والأيد في الأيد
بسمة حلوة مع لمعة عين والحلم بعيد
خضرة الأحلام كما طفل في المهد وليد
رقم15
لقمة بسيطة خفيفة تسد الجوع وكفاية
أما العقل ما بيتغذى الا بمعرفة وقراية
تسمع مزيكا وتركز في كتاب ولا رواية
تلقى العقل اتغذى والمزيكا للروح زكاية
صلاح منير
مصر