على الرصيف نايمين
كلاب وبنى ادمين
الكلب أصبح وفى
والأخ زى الطين
وناس كمان تانين
لاحسوا يوم بيهم
ولا عدِّلوا القوانين
فى ناس عشاهم هوى
وناس فطورها لحوم
وناس ما لاقيه الدوا
وناس دواها النوم
والكل بنى ادمين
عايشين مع الضالين
بيعلُّوا فى عروشهم
ويزيدوا فى كروشهم
على الفقير كابسين
يارصيف صبحت مضيف
لكل شخص ضعيف
يا أحن على الغلبان
من كل آسى جبان
ماترد يوم مسكين
سيف الغنى مسلول
على الفقير سكين
وقف الضمير فى الحلق
من صرخة المسكين
مافى يوم يقول الحق
ولو بنظرة عين
والشكوى للغلبان
مسجونه جوه ميدان
لا فى يوم تشوف النور
ولا تبقى فى الدستور
والذنب ذنب الصوت
لما يعيش ويموت
وهو شبه سجين
على الرصيف نايمين
كلاب .. وبنى أدمين
.. طلعت عامر
0 التعليقات:
إرسال تعليق