********** زينة الصبايا .. كلمات .. سعد المهدي

مرت نسمة حواليا .. صَحت قلبي .. وعنية 
نسمة جاية مبتسمة .. من بسمة .. رسماها صبية 
شدَّتني وراها .. شغلني هواها .. لحد ما قرَّبْت .. خطوتين 
صبية يا صبية .. يا زينة الصبايا
صبية يا صبية .. يا ام طرحة .. وعبايا
نفسي يا صبية ومنايا .. تكملي المشوار معايا
صبية يا صبية .. ردي بكلمتين
لا ردت .. ولا هدت .. وسابتني في حيرتين
أَمشي وراها .. والا انساها .. وانسى هواها
والا .. أروح علي فين
صبية يا صبية .. ما تهدي الخطوة شويه
مرت نسمة حواليا .. صَحت قلبي .. وعنية
**********
مشيت .. مشيت .. لا طال المشي .. ولا مليت
مشيت .. مشيت .. يهون المشي .. ما دمت حبيت
مشيت .. مشيت .. لحد ما عرفت البيت
رجعت .. وقلبي معايا .. فرحان طاير بهوايا
سألوني .. ايه الحكاية ؟ حكيت .. م البداية للنهاية
قالوا كلام منايا .. سمعته والقلب .سامع معايا
صبية يا بني .. زينة الصبايا .. أخلاق وأدب .. وكل المزايا
وأوعى يا ابني .. أوعى تسيبك
ويا رب يا ابني تبقى نصيبك
وتكون لك .. دي الصبيه
مرت نسمة حواليا .. صَحت قلبي .. وعنية
**********
جريينا .. جريينا .. ع الأحباب .. وفضلنا ندق .. ندق الباب
ونقول جايين .. جايين .. خطاب .. ويا ريتكو تقولوا موافقين
موافقين .. موافقين .. ردوا وقالو : موافقين
خلاص يا قلبي ارتاح .. اِرتاح .. شوية
حبيبي خلاص .. خلاص .. بقى ليا
يا سلام يا حب .. جمَّعتنا .. يا سلام يا حب .. اسعدتنا ..
يا سلام .. يا حب .. متشكرين
ويا ريت .. يا حب .. زيينا .. تسعد كل قلب حزين
ويا ريت .. يا حب ف الهنا .. تجمَّع كل صبي وصبيه
مرت نسمة حواليا .. صَحت قلبي .. وعنية