إفرد شراعك يا قلبي
------------------
بقلمي - عادل عبد الرازق
-----------------------
إفرد شراعك يا قلبي
ولا تنكسر في الدوّامات
إرمي الذكريات بعيد
صعب موج الذكريات
مهما بعدت عنا الشطوط
وحلمنا الطاير رفض الهبوط
ولاّ بكره عشق اللي فات
إفرد شراعك يا قلبي
ولا تنكسر في الدوّامات
...
بكره يتولد الشروق
من قلب الضلمة ميلاد
ويتمحي شبح الغروب
في بلاد مداها بلاد
ما تخافش م الريح تحاوطك
ولا ترسم ملامحك ضياع
إزرع في جرحك جنينك
مركب ومينا وشراع
تقصر رحلتك أو تطول
غني واحلم بالوصول
لو غيّمت سما المسافات
إفرد شراعك يا قلبي
ولا تنكسر في الدوّامات
...
مهما البحور فيها غريق
برضو البحور فيها حياه
لابد تقبل الطريق
ممنوع رجوعك حتى لو تاه
مهما الغيوم ولدت غيوم
مهما السما رفضت نجوم
مهما الغنا أصبح سكات
إفرد شراعك يا قلبي
ولا تنكسر في الدوّامات
...
لو يكون بحرك غيام
لو تعاندك الصخور
قدّف بنبضك وحلمك
حتشوف سدودك جسور
رغم البحور الغريقة
لابد توصل للحقيقة
جوّه ومان المتاهات
إفرد شراعك يا قلبي
ولا تنكسر في الدوّامات
...
رحلتنا لازم تكون
وصول بيحضن حلمنا
أدّ الزمن لو يكون
رافض حروفنا وإسمنا
إنت وانا نبدأ من جديد
ونحقق الحلم السعيد
ونهزم يا بكره الذكريات
إفرد شراعك يا قلبي
وخطّي كل الدوّامات
***
0 التعليقات:
إرسال تعليق